مقدمة - لماذا فشلت الثورة في مصر

لماذا فشلت الثورة فى تغيير مصر للأفضل

 

الثورة فشلت في تغيير مصر لان ما كانش لها أهداف غير أسقاط مبارك و انهاء التوريث و الهدفين دول اتحققوا يعنى الثورة نجحت فى تحقيق أهدافها لكن فشلت في تغيير مصر للأفضل

الثورة فشلت بصفة عامة لان ما كانش فيه رؤيه ل ماذا بعد فالناس اتفرقوا و كل فصيل دور على مصلحته

   الثورة فشلت لأن القوة الأقوى و الأكثر تنظيما هى الجيش وعامة الجيش فى أي دولة جهة محافظة غير محبة للتغيير

الثورة فشلت لأن اللى حصل كان زى فيلم الأرهاب و الكباب الناس لما نجحوا ما عرفوش يُجمعوا غير علي اكلة كباب ! في ثورة يناير  الناس ما كانش لها رؤية واضحة للمستقبل غير التخلص من مبارك و الحزب الوطنى ولما الثورة نجحت فى عزل مبارك و تفكيك الحزب ، جميع الرؤى و المسارات كانت تقليدية مش ثورية

انتخابات , تعديل دستور , البيضة الأول و الا الفرخة , ماحدش فكر أيه أصل المشكلة قبل ما يقترح الحل ، فدخلوا في التفاصيل قبل ما يحددوا المشكلة الأساسية

أنا من وجهة نظرى ان الثورة فشلت في التغيير بسبب ثقافة المجتمع و المفاهيم السائدة

  عندى حكايتين علشان أوضح وجهة نظرى ؛ الأولى واحد زميلى أخوه كان عايش فى سويسرا ؛ راح يزوره هناك و قابل أحد أصدقاء أخوه ؛ فزميلى بيهزر مع صديق أخوه السويسرى و قال له ؛ أنا عاجبانى سويسرا جداً ؛ يحصل أيه لو المصريين بدلوا مع السويسريين بلدهم ؛ رد السويسرى و قال بعد كام سنة مصر هتبقى زى اللى انت شايفه هنا ؛ و سويسرا هتبقى زى مصر ؛ القصة دي وجعتنى جداً ؛ و بعدها بفترة زميل تانى كان بيقوللى ؛ أنا نفسي يبقى معايا عصا سحرية ؛ أوقف بيها كل الناس فى مصر (يجمدهم أو ينيمهم) ؛ و أصلح الشوارع و المبانى و أنضف الدنيا ؛ و بعدين أصحي الناس تانى ؛ فأفتكرت قصة زميلى الأولانى و قلت له ؛ بعد كام يوم كل حاجه هترجع زى ما كانت ؛ أنت محتاج تغير طريقة تفكير الناس و أخلاقهم بالمرة

علشان ننجح فى التغيير احنا مش محتاجين ثورة على الحاكم أو النظام ؛ أحنا محتاجين ثورة على ثقافة المجتمع ؛ لأن من وجهة نظري الحاكم و نظام الحكم نتاج ثقافة المجتمع و اللى عايز يتأكد من كلامى يقرأ تاريخ الجبرتى ؛ إصلاح مفاهيم المجتمع و توضيح المفاهيم السلبية علشان نفكر إزاى نغيرها ؛ هو ده اللى هتكلم عنه فى البلوج ده ؛علشان يبقى فيه أمل إن البلد تنضف فى يوم من الأيام